رسالة بكتبهالكِ يا بنتي علكِ تستفيدي...
ابنتي العزيزة في امور احب اوضحهالكِ عن حاجات ممم يمكن مش حتعجبكِ ف العالم بتاعنا ده
اول حاجة حتقبلكِ يا ضنايا انكِ حيطلب منكِ انكِ تقومي بالعملية-انا عارفة انها حتبقي صعبة عليك-ِعملية التنفس يا حبيبتي-ايون-دي حاجة احنا كلنا بنعملها يعني معلش تاني حاجة-وعارفة انكِ حتتألمي نفسياً اوي خالص وانا كمان والله-بس معلش حعمل ايه يعني غصب عني ياروحي هي الفطام،(هكذا هي الحياة حرمان) المهميا حبيبتي حتكبري شوية وتبدأي تعتمدي علي نفسك وتقفي علي رجليكِ ساعتها جه وقتها ان اسيبكِ تقعي-طبعا انا بحبكِ بس بعمل كده عشان تتعلمي انكِ تقفي تاني لوحدكِ حتقعي كتير معلش لحد ما تتعلمي(هكذا هي الحياة تجارب) كبرتي يا حبيبتي وبقيتي تقولي ماما وبابا ولا..لاء ما تئلئيش مش حوديكي الحضانة-مش انا الام اللي تدفع بنتها للحضانة ابداااا-بعد كده بقي تعدي الايام والسنين لحد ما حبيبتي تكبر وتبقي اجمل وردة مممممم ويحصلكِ حاجات وتغيرات فسيولوجية متئلئيش خالص دي حاجات بتحصل لكل البنات عادي،ووقتها حكون مفهماكِ كل حاجة طبعا ايوة ماحنا حنكون اصحاب(هكذا هي الامومة وإلا فلا)-وعليه-حتيجي مرة من الجامعة لونكِ مخطوف ومسهمة كده حسألكِ -بخبرة الام - مالكِ؟ حتقوليلي ياماما مش احنا صحاب وانا ما بخبيش حاجة عنكِ..الخ وبعدها تقولي مممم انا ممم انا بحب ياماما ساعتها يا حيبتي بخبرة الام برضة حكتم مشاعر الغضب وافرقع بلونة الشبشب ابو صباع واسألكِ بلطافة: ممم ياسلام بتحبي يابطة؟؟ مممم اية يعني ان شاء الله مين يعني وشوفتيه فين خير يعني؟؟؟انطقي!!
حتردي تقولي ياماما ياماما ده زميلي ف الجامعـ (اقطعكِ)طالب بسلامته؟؟
انتي:ايوة ياماما.. ده انسان محترم جدا وانا مارضيتش اتكلم معاه قلت له عندك بابا روحله
ارد بمنتهي الخبرة:ابوكي مش حيوافق... ولا انا.. احمدي ربنا اساسا اننا سبناكِ تكملي تعليمكِ ...احيه ال بحب زميلي ال مافيش بنت محترمة بتحب...ياخسارة تربيتي فيكِ ،(فترة سكوت وبعدها اكمل) طب ياختي ما تحبي شلبي ..شلبي اولي...مالو شلبي؟؟
انتي يا غلابوية:تاني ياماما تااااني؟؟ مابذيادة بقي هي السيرة دي ما بتخلصش؟
انا: اسمعي كلام امكِ وخدي ابن عمكِ ربنا حيفرج لكِ همكِ
انتي:ماشي يامّه نتفق... خليه يجي يكلم ابويا ويقعد معاه ويشوفه وبعدين اذا ما عجبشي..ابقوا قرروا بعدها اني اتجوز شلبي ولا هبلي ساعتها
انا: م الاخر يا بنتي ..انا وابوكي مش موافقين ..ده اخر كلام.. ركزي ف مذكرتكِ..بلا قله حيا
انتي :ده ظلم وحيات ربنا..طب اعمل اية..افطسكوا مثلا يعني..اعمل اية ياربي!!
اقطعكِ انا بالكلمة اللي بتخرس جميع البنات:اخرسي يا بنننت
المهم يعني تعدي كمان شوية سنين و..انتي عارفة يا حبيببتي اني بحب النظام فارجوكي ماتزعليش لما ازغر لمقصوف الرقبة حفيدي_شلبي الزوغير-اما يشب ويوقع الفازة ويصر ان لازم يكسرها او لما يجي يسألني ببلاة ستو ستو انا جيت ازاي ..او اي فعل مجرم يخدش وقاري وانا ف السن ده
ولو موت اساسا قبل اليوم ده ما تصوتيش عليا يعني للدرجة اللي تبوظ وقار مراسم العزا وما تزعليش ان ما سبتلكيش حاجة يعني عشان تتفشخري بيا عادي يعني-هكذا هم العظماء يرحلون دون ان يتركوا اثر- ومتئلئيش فانتِ اجلا ام عاجلا حتلحقي بيا
بس والنبي يا حبيبتي-بعد الشر يعني- لو كان عاجلا ما تنسيش بعد ما تيجي تقفلي الباب وراكي لانكِ زي مانتي عارفة ما بخدش راحتي الا لو كان الباب مقفول
