انا مش فاهمة بصراحة هو انا بنت البطة السودا يعني؟ كل مرة انا اللي ادخل وانضف واهوي وامسح هو اي نعم انا فعلا بقالي كتير ما نضفتش هنا لاني بقالي كتير ما دخلتش هنا
واما دخلت لاقيت ريحة العشة مكمكمة ولا القبر وصاصواذكات ماشاء الله مبخر المكان حتي لاقيت علي صورتي الجميلة اللي ماسكة مضرب الجولف.. احم احم لاقيت ..بس اما تيجي يا صاصو قاعدة تتفسحي وحاطة علي قلبكِ مراوح وسايبة قطتكِ تعمل كاكا في كل مكان وعلي صور الناس يعني ينفع كده طيب؟ بس اما اشوفكِ.

المهم انا كنت داخلة عشان اقول ان في حاجات غريبة بتحصل بتنبثق من واقعنا كده ماتعرفش،حاجات تخليك تضحك لدرجة تفطسك من العياط وحاجات تانية تبكيك لدرجة الضحك الهستيري
وفي حاجات بتخليك مش عارف المفروض تعمل انهي الاول تضحك ولا تعيط؟ فيطلع الاتنين في نفس واحد في وقت واحد
وعليه في حدثة انبثقت في وشي النهاردة ع الصبح خلتني اسح من الضحك ،خير اللهم اجعله خير واحنا راجعين لاقينا عربية لوري وشها متطبق مدشدش وشبه لهيكل لعربية ملاكي متفشفش قدامها وازاز متنطور وع الرصيف مكتوب بالبنط العريض في جرنال مغطين بيه الجثة المدهوسة"الحكومة تسعي للبدء في المرحلة الثالثة لحل ازمة المرور بحلول 2010"

!