خلاص حققت اكتفائي من وف كل شيء وماعدش ف متسع لاي شيء
اكتفيت حب واكتفيت حنين
اكتفيت وكسة واكتفيت خزي
اكتفيت قهر واكتفيت مسخرة
اكتفيت ضحك واكتفيت عياط
اكتفيت زعل واكتفيت هزار
اكتفيت جد واكتفيت سخافة
اكتفيت اكشن واكتفيت كرتون
اكتفيت فسح واكتفيت قاعدة ف البيت
اكتفيت تليفزيون واكتفيت نت
اكتفيت رسم واكتفيت غسيل مواعيين
اكتفيت فلوس واكتفيت سلف
اكتفيت ظلم واكتفيت اتظلم
اكتفيت اصدقاء واكتفيت وحدة
اكتفيت تركيز واكتفيت لا مبالاة
اكتفيت فاليوم واكتفيت قهوة
اكتفيت فيروز واكتفيت سوبيا
اكتفيت نوم واكتفيت سهر
اكتفيت وداع واكتفيت فقد
اكتفيت برد واكتفيت صهد
اكتفيت محاولات
واكتفيت من اكتفيت
خلاص
هناك تعليقان (2):
أكتفيت ده دوا كحة كويس لعلمك وشكلك كده اشتغلتى فى شركة فايزر للأدوية وعايزة تعملى اعلان مجانى وتطلعيلك بقرشين على قفا فراخ العشة ...
ومش كل حد بقا مدفعش فاتورة الكهربا بتاعتهم قاموا شالوا العداد بتاعهم يقوم يرقع ميت صوت ويقول انطفاء يا خالتى :( مش عارف اجيب الشكل اللى رافع حاجبه ده ... المهم ههههه انا بس مش عارف ايه الرابط بين القهر والمسخرة هههههههه وايه الرابط بين فيروز والسوبيا ... الا اذا كنتى تقصدى فيروز بطعم اليوسفى ذو الحبيبات المبقللة .
عموما دى حالة طبيعية بتيجى دايما مع دخول فصل الشتا حيث يكسى اللون الرمادى معظم الاشياء ولكن دعينا ننظر الى الجانب المضيئ ونسجد لله شاكرين انه لم يخلقنا خرفان كان زمان عبد الله سليمان بياكل ممبارنا محشى رز حصى بالخلطة.
كل سنة واحنا مش خرفان .
فسحوا كده يا جماعة، دوا كحة؟ دوا كحة؟
طيب بلاش اكتفيت امشي يا اكتفيت امشي
شبعت من كل حاجة تنفع؟
المهم ههههه ايوة...الرابط بين القهر والمسخرة يا ابراهيمو انهم بقوا شبه بعض :))
بما اني شبعت من كل حاجة فبقيت كل حاجة زي كل حاجة
فتلاقي مثلا الحنين بقي زي غسيل المواعيين وفيروز بقيت زي كوباية السوبيا
وعليه ف القهر زيه زي المسخرة
وعن جانبك المضييء:)) ف يابخت الخرفان ..الفارق بينا وبينهم ..ممبارهم بياكله عم عبد الله وممبارنا حياكله- اجلا ام عاجلا-الدود
استغفر الله العظيم
هزار الفلاحين ده حيوديني ف داهية انا عارفة
إرسال تعليق